"இடைவேளை"பற்றிய
உங்கள் சொற்களின் பாய்ச்சலில்
அந்த மின்னல் இழையை
வருடிப்பார்த்து விடலாம்
என்று நாங்கள்
தோற்றுப்போனதில்
மகிழ்ச்சியே வெள்ளமாய்
கரை புரண்டு ஓடியது.
வரிக்கு வரி
கரை உடைத்து ஓடும்
அந்த காவேரியின் பூநுரைக்குள்
ஆயிரம் ஆயிரம் புயல்கள்.
தலை உடல் வால்
என்று கசாப்புத்துண்டுகள்
போடக்கூடியதா
காலம் எனும்
உங்கள் கவிதை காட்டும்
காட்டாற்றுப்பாம்பு?
அதிலும்
அந்த மருத்துவர்களின்
மூச்சுக்காடுகளுக்குள்
முடங்கி கிடக்கும் நோய் உற்ற
உயிர்களை
மீட்டுத்தரும் அந்த கணங்களின்
வெற்றித்துடிப்புகள்
கோடி இமயங்களை
கொண்டுவந்து குவிக்கும்
வரிகள் ஆகும்.
உங்களோடு ஓடிவரும்போது
அந்த சொற்களில் நட்டுத்தரும்
உங்கள் மைல்கற்களில்
பின்னோக்கி ஓடும்
ஒரு டைம் ட்ராவல் ஓர்மை
எங்களுக்குள் புகுந்து கொண்டு
அந்த குறுந்தொகைத்தமிழை
குழைத்துத்தரும் உங்கள்
மூச்சுக்களில்
நாங்களும் முத்துக்குளிக்கின்றோம்.
தமிழின் படிப்பறிவு மட்டும் அல்ல
அதன் பட்டறிவும்
உங்கள் கவிதையில் பட்டுத்தெறித்து
பட்டொளி வீசுகிறது.
அன்புடன்
சொற்கீரன்
(இ பரமசிவன்)
___________________________________________________________________
கருத்துகள் இல்லை:
கருத்துரையிடுக