சின்னச்சின்ன பனித்துளிகளே
மேலிருந்து நீங்கள்
வீசி வீசி எறிகின்ற இவை
முற்றுப்புள்ளிகளா?
நிறுத்தற்குறிகளா?
முக்கால் புள்ளிகளா?
எங்கள் வாழ்க்கையின்
உடல் உறுப்புகளே இவை.
உள்ளே வெப்பமாய் தகிக்கும்
உயிரின் இழைதலில்
நீக்களும் எங்களுக்கு
குழைக்கின்ற வெண்கவரிகள்
வீசத்தான் போகிறீர்கள்.
கேள்விக்குறிகளும்
விடை தெரியும் போது
வரும் வியப்புக்குறிகளும்
மனிதனிடமிருந்தே
தெறித்த பின் தான்
கடவுள் தன்னையே
முதலில் படைத்துக்கொள்கிறான்.
மண்ணின் மலர்ப்புகளும்
காய்ப்புகளும் கனிப்புகளும்
உங்களுக்கு எத்தனை எத்தனை
சுவாரஸ்யமான நாவல்கள்
எழுதப்போகின்றன.
உங்கள் கடவுள்களிடம்
நீங்கள் உருகிக்கரைவதற்கு முன்
இந்த நிகழ்வுகளை ஒப்பியுங்கள்.
தேவ வசனங்கள் இனிமேல் தான்
அதிலிருந்து எழுதப்படும்.
இப்போது அந்த மணியொலிகள்
கடவுளின் மூளித்தனத்து
செவிமடல்களின் சவ்வுகளை
உரிக்கட்டும்.
மனிதன் மனம் பாயுமிடம் எங்கோ
அங்கு தான்
பரமண்டலத்துக்கு
விதைகள் தூவப்படுகின்றன.
வெற்று மலட்டுச்சுவடிகள்
பிரமன்களை இன்னும்
மலட்டுப்பிம்பங்களாய் தான்
கிறுக்கி வைத்திருக்கின்றன.
_________________________________________________
சொற்கீரன்.
கருத்துகள் இல்லை:
கருத்துரையிடுக