கந்தல் சொற்கள்
________________________________________
சொற்கீரன்.
விண்வெளி முழுதும் இனி
குப்பைத்தொட்டிகள்.
கைபேசிக்கனவுச் சிதிலங்களும்
செயற்கை மூளையில்
கடவுளோடு நடத்திய
பேரங்களும்
படுக்கை அறை சினிமாக்களின்
ஓட்டிடீ
மிச்ச எலும்புத்துண்டுகளும்
மாமிசங்களும்
விண்ணில் எறியப்படும்.
மானிடநேயம் கழன்று விட்ட
உலக நடப்புகளின்
ஓட்டை உடைசல்களும்
பிணங்களைத் தழுவி
பேரின்பம் காணுதல் போல்
மதங்களின் முறுக்கேற்றிய
உணர்ச்சிகளின் உன்மத்த வெறிகளும்
இனி
விண்வெளித்திடலில்
ஆன் லைன் அலைகளாய்
குவிக்கப்படும்.
ஒரு பச்சைப்புல் கீற்றில்
சூரியன் எழுதிய கவிதையாய்
பனித்துளிக்குள்
கருவுயிர்த்த ஒரு
குறுந்தொகை வரி
வானவில் காட்டியது.
கல்பொரு சிறுநுரை போல
கனல் பொறி காட்டும்
காதல் கடலின் ஏக்கம்
பெரிது பெரிது அம்மம்ம!பெரிது!
கணினிகள் கிழித்த கந்தல் சொற்கள்
வானம் முட்டி
இங்கு இருட்டியது.
________________________________________________
கருத்துகள் இல்லை:
கருத்துரையிடுக