ஆகா! அருமையான தீவு.
===============================================ருத்ரா
ஆகா! அருமையான தீவு.
உல்லாசத்திற்கு குறைவு இல்லை.
எங்கு பார்த்தாலும்
குத்தாட்டம் குதியாட்டங்கள் தான்.
வண்ண வண்ணக் கொடியேந்தல்கள்.
கொள்கை விளக்கங்கள்.
நமக்கு எவ்வளவு மரியாதை?
நம் காலில் விழாத குறையாய்
வணக்கங்கள் வணக்கங்கள்.
டிவி ஊடகங்கள்
செய்திகளைக்கூட
திகிலூட்டும் சினிமாக்கள் ஆக்கின.
நாலைந்து பேராய் உட்கார்ந்து கொண்டு
நார் நாராய் கிழித்தனர்
நம் அரசியல் கந்தல் கூளங்களை.
கட்டு கட்டாய் பணங்கள்
நமக்குத்தான்
சமையல் ஆகிக்கொண்டிருக்கின்றன.
இந்த திருவிழாவில்
பொய்க்கால் குதிரை ஆட்டங்கள்
மயிலாட்டங்கள் ஒயிலாட்டங்கள்
புலியாட்டங்கள்..
பார்க்க பார்க்க தெவிட்டாத காட்சிகள்..
என்ன இது?
பூமி நகர்கிறது மண் நடுங்குகிறது.
அலங்கார அமைப்புகள் எல்லாம்
சரிகின்றன..
ஆம்..அது தீவு இல்லை.
ஒரு திமிங்கிலத்தின் முதுகு.
கருப்புப்பணத்திட்டு அது.
அந்த தேர் திருவிழாக்கள் எல்லாம்
அதில் தான்
தாரை தப்பட்டைகள் முழக்குகின்றன.
ஓட்டுகள்
பொறிகளில்
தட்டப்படும் நேரம் வந்துவிட்டது.
கனவுத்தீவு அதோ மூழ்கிக்கொண்டிருக்கிறது.
திமிங்கிலம் மூழ்கிக்களித்து
விளையாடுகிறது.
=====================================================
கருத்துகள் இல்லை:
கருத்துரையிடுக