பரியேறும் பெருமாள் "கருப்பி"

பரியேறும் பெருமாள் "கருப்பி"
===============================================ருத்ரா

எத்தனை படங்கள் வந்து விட்டன.
காதல் கௌரவக்கொலை
மற்றும் சாதி மத வெறியின்
ரத்தக்குழம்புகளோடு?
இதிலும்
காதல் மெல்லிய அருவி தான்.
அந்த உணர்வு வெளிப்படுத்தும்
நளினங்கள்
ஒரு நுட்பமான குறுநாவல்
எழுதப்பட்டது போல்
இயக்குனரின்
மயிற்பீலி கொண்டு அழகாய்
எழுதப்பட்டு இருக்கிறது.
வழக்கமான முரட்டுத்தனம்
சாதி ஆதிக்கத்தில் இருந்த போதும்
ஒரு புதிய கோணம்
கோடம்பாக்கத்து காமிராக்களிடையே
இருந்தது இந்தப்படத்தில்.
வெள்ளைக்காரர்கள் தங்கள்
சட்டத்தால் நம்மை
அடிமைப்படுத்தியிருந்தாலும்
அவர்கள் ஆங்கிலத்தால்
நாம்
நம் கண்களைத்
திறந்து கொண்டோம்.
நம் கட்டுகளை
அவிழ்த்துவிட்டுக்கொண்டோம்.
அதனால் தானோ என்னவோ
தமிழும் இங்கிலீஷும்
இங்கே காதலிக்கும் நேர்த்தியை
கதாநாயகனும் கதாநாயகியும்
தங்கள் அற்புத நடிப்பில்
உயர்த்திக்காட்டியிருப்பது
இப்படத்தில் இன்னொரு சிகரம்.
அப்படியென்றால்
அந்த மற்றொரு சிகரம்..
அது தான் கருப்பி.
"கருப்பி" என்ற பெயரில்
அந்த பாத்திரம்
சிலிர்த்துக்கொள்வதைப்பார்த்தால்
ரஜனி தான்
அதற்குள் இருந்துகொண்டு
மனித உரிமைக்கு
கருப்பு செங்கீதத்தை
"காலா"வாக 
முழங்குகின்றாரோ
என்று நம்மை
அதிர வைத்துவிட்டது இந்தப்படம்.
எழுத்தாளர்களின்
மனிதநேய எழுத்துக்கள்
பொமரேனியன்கள் என்றால்
அவற்றை வேட்டையாடுவது
சாதி மத ஆதிக்கங்களின்
"அல்சேஷியன்கள்" தான்.
இவற்றைக்கண்டு கொள்ளாத‌
தெரு நாய்களாய்
தெருக்கள் தோறும்
மக்கள்
நாய்களின் மந்தைகளாகி
ஆகி விட்டனரோ என்ற‌
ஆதங்கம்
இந்தப்படத்தின் "பூதாகரமான"
கருப்பொருள்.
அந்த கருப்பிக்கு நிகழும் க்ளைமேக்ஸை
கவனிக்கும் போது
இங்கு
"கருப்பி ஒரு சிவப்பி"ஆனது
புரிகிறது.
சமுதாய மாற்றங்களின்
ஒரு எச்சரிக்கையாக‌
விடியும்  "சிவப்பு விளக்கு" ஒன்று
நாய்வேடம் போட்டுக்கொண்டு
நம்மை திகைக்க வைத்துவிட்டது.

=====================================================