சீம ராஜா என்றொரு வசூல் ராஜா

சீம ராஜா என்றொரு வசூல் ராஜா
================================================ருத்ரா


சிவகார்த்திகேயன் ஒரு காமெடியனா?
சிவகார்த்திகேயன் ஒரு (வளரும்) சூப்பர்ஸ்டாரா?
சிவகார்த்திகேயன் ஆக்சன் ஹீரோவா?
சிவகார்த்திகேயன் ஒரு நடிப்புச்செம்மலா?

இந்தக்கேள்விகள்
அவரது ரசிகர்களிடம் கேட்கப்பட்டால்
அவர்கள் திணறலாம்.
ஆனால் சினிமா பார்க்கும்
குட்டிப்பயல்கள் எல்லாம்
சொல்லிவிடுவார்கள்
அவர் இல்லாமல் சினிமா இல்லை என்று.
இத்தனைக்கும்
அவர் தன் பாக்கெட்டிலேயே
வைத்திருப்பது போல்
சூரியை கங்காரு குட்டியாய் ஆக்கி
ஓடி ஓடி நடிப்பார்.
இவர்கள் இருவரும்
அடிக்கும் லூட்டியில் தான்
இந்த வசூல் ரகசியம் இருக்கிறது.
"கலாய்த்தல்" என்பது தான்
இப்போதைய தலைமுறையினர்
கையாளும்
நடிப்புக்கலையின் இலக்கணம்.
சிவகார்த்திகேயன் ரஜனி ரசிகர்தான்.
ஆனால் அவர் போல்
சிகரெட்டுகளை ஆகாசத்தில் போட்டு
வாயில் கவ்வும் சர்க்கஸ் எல்லாம்
இல்லாமலேயே
ஒரு "கலாய்த்தல்" மன்னராக வலம் வந்து
தான் வகிக்கும் பாத்திரம்
தளும்ப தளும்ப சிரிக்கவைத்து
சிலம்பம் ஆடுவதில் வல்லவர்.
அவர் கதாநாயகிகளிடம் கூட‌
காதலில்
ஒரு ரோஜாப்பூவை நீட்டும்போது கூட‌
அந்த கலாய்ப்பின் வாசனையில்
தியேட்டரே திக்கு முக்காடிப்போய் விடும்.
ஒரு வித்தியாசமான ஹீரோயிசத்தை
அவர் வெளிப்படுத்தும் விதமே
இன்றைய அவர் வெற்றிகளுக்கு காரணம்.
பழைய தலைமுறைக்காரர்கள் இன்னும்
அந்த "காதலிக்க நேரமில்லையையே"
மென்று மென்று குதப்பி
சிரித்துக்கொண்டிருப்பார்கள்.
ஆனால்
சிவகார்த்திகேயன் படங்கள்
அதே காமெடி ரசனையை இன்றும்
தந்து கொண்டிருக்கிறது.
தொடர்ந்து
அவர் ஒரு பந்தயக்குதிரையாய்
எல்லோரையும் முந்திக்கொண்டு ஓட‌
நமது வாழ்த்துக்கள்.

=============================================================