அன்பின் ஒளிர்வு
____________________________________________________
ருத்ரா
பனி விழுதுகள்
மண்ணைப்போர்த்துகின்றன.
அடிவயிறு
எரிமலைக்குழம்பில்
எதைக் கர்ப்பம் தரிக்க
காத்திருக்கிறது?
பரிணாமக்கனவுப்படலங்கள்
தோலுரிந்து தோலுரிந்து
வெளிக்காட்டுகிறது.
பிரம்மாண்ட மிருகங்களின்
எலும்புக்கூடுகளும்
கண்ணுக்குத்தெரியாத
நுண்ணுயிரிகளும்
பனிப்பாளங்களில்
இப்படிப்பதிவிட
இந்த கணினிகளுக்கும்
முன்பாக வந்த
கணினிகள் ஏதேனும் வந்து
எலும்புக்கூடுகளின்
எலும்புக்கூடுகளாக அங்கு
மிஞ்சிக்கிடக்குமா?
அடிமுடியே தெரியாத ஒரு கணிதம்
ஞானப்பிழம்பாய்
மனிதனின் கருவுக்கு முந்தியே
ஒரு கருவின் நிழலாய்
இங்கே எங்கேயோ
இழைந்து கிடக்கிறதோ?
இன்வெர்ஸ் ஆஃப் இன்ஃபினிடி இஸ் சீரோ.
இன்வெர்ஸ் ஆஃப் சீரோ இஸ் இன்ஃபினிடி.
கடவுளுக்கு அடியில் சைத்தான்.
சைத்தானுக்கு அடியில் கடவுள்.
அதற்கு அடியில் இது.
இதற்கு அடியில் அது.
பொய்யும் மெய்யும்
கலந்து செய்த இந்த
பொரு(ள்) விளங்கா உருண்டை
இனிக்கிறது
அல்லது
கசக்கிறது.
புத்தாண்டு தோறும் வருகிற
பிரசவ வலி இது.
வலியே இங்கு உயிர்ப்பு.
மனிதனின் காக்காய் வலிப்புச்சித்திரங்களில்
மத நொதிப்புகளே
இங்கு
சிலுவைமரங்களாய்
முண்டு தட்டிக்கொண்டு நிற்கின்றன.
ஓ!
மனிதா!
உன் வானம் உன் வெளிச்சம் எல்லாம்
இனி
உன் அறிவின் துளிர்ப்பு தான்.
அன்பின் ஒளிர்வு தான்.
இருட்டுக்கந்தல்கள் அழிந்தொழியட்டும்.
இன்னிசைப்பண்கள் முழங்கட்டும்.
________________________________________________________
கருத்துகள் இல்லை:
கருத்துரையிடுக