நம்மோடு ஒரு நமைச்சல்...
________________________________
ருத்ரா
நாம் பதிவிடும் எழுத்துக்களோடு
கட்டப்பட்டு அது வருகிறது.
நம் பாட்டும் நடனமும் கூட
அதில் தோய்த்துக்கொண்டு தான்
வருகின்றன.
சூடான அரசியல் பேச்சுகளினூடே
அதுவும்
சூடான பக்கோடாக்களாய்
பார்சல் செய்யப்பட்டிருக்கின்றன.
சினிமா நடிகர்கள் பற்றிய
துணுக்குகள் கிசு கிசுக்கள்
அவர்கள் படங்களின் டீசர்கள்
ஆகியவற்றின் இடைவெளிகளில்
அதுவும் படுத்துக்கிடக்கிறது.
என்னவோ சங்கரரின் தத்துவங்கள்
ஐன்ஸ்டீனின் கோட்பாடுகள்
தொலைக்காட்சி விவாதங்கள்
என்று
யூ டியூப்களின்
எல்லா நமைச்சல்களிலும் அல்லது
எல்லா சுவாரஸ்யங்களிலும்
அது "படுதா"கட்டிக்கொண்டு
பொம்மலாட்டங்கள் காட்டுகிறது.
நம் மூளைக்கும் அறிவுக்கும்
நல்ல பயிற்சி என்ற பெயரில்
சிறுவர்கள் முதல் இளைஞர்கள் வரை
விதம் விதமாய் களிக்கும்
கேம்களின் வி ஆர் காட்சிகளையும்
பிளந்து கொண்டு
நரசிம்ம அவதாரம் காட்டுகிறது அது.
நம் கணினி அறிவு
ஒவ்வொரு நேனோ செகண்டிலும்
புதுப்பிக்கப்படுகிறது என்று
நமக்கெல்லாம் மிக மிக பெருமிதம்.
ஆனால்
அவையாவும்
இதற்குத்தான் படைக்கப்படுகிறது.
ஆம்
விளம்பரங்களுக்கும் மற்றும்
கசா முசா துக்கடாக்களுக்கும் தான்.
நம்மோடு ஒரு நமைச்சலாய்...இது
சொரிய வைத்துக்கொண்டிருக்கிறது.
டாலர்களின் ஒவ்வொரு சென்டும்
ராட்சசத்தனமாய் குட்டி போட்டு பெருகி
பங்குமூலதனத்து பெரும் பலூன்களாய்
தாராளமய வெளியில்
மிதக்கின்றன.
ஆனால் பசியும் பட்டினியும்
நோயும் நொம்பலமும்
உலகத்தின் எல்லா
அட்சய ரேகை தீர்க்க ரேகைகளின்
கட்டங்களில் இன்னும்
கோரைப்பல்
காட்டிக்கொண்டு தான் இருக்கின்றன.
__________________________________________________________
கருத்துகள் இல்லை:
கருத்துரையிடுக