ஒரு புதிய உதயம்
========================================ருத்ரா
இன்னும் கொஞ்சம்
சம்பாதிக்கலாமே
என்பது தான்
ஒவ்வொருவனுக்கும் ராஜகிரீடம்.
நசுங்கிய டால்டா டப்பாவில்
கிடக்கும்
அந்த சில்லறைச்சத்தங்கள் தான்
இப்போது அவன் கேட்கும்
ராஜ சங்கீதம்.
இது அவனுக்கு
வயிறு புடைக்கும்
விருந்தை
கனவுகளாக்கி கொடுக்கிறது.
இமயத்தின் விளிம்பில் நின்று கொண்டு
இன்னும் ஒரு
கூழாங்கல் உயரம்
ஏறிவிட வேண்டும்
என்று நினைப்பதே
வெற்றிகளின் விஞ்ஞானம்
ஆம்
அந்த வானம் முழுவதையும்
என் பாக்கெட்டில் நிரப்புவதே
இந்த மாத டார்கெட்.
அடுத்த மாதம்
இந்த கோள்களையெல்லாம்
சூயிங் கம் ஆக்கி
சவைப்பதே என் டார்கெட்.
அதன் புல்ஸ் ஐ
என்னைத்தான் எனக்கு மட்டும் தான்
நோக்குகிறது
அல்லது
நோக்கப்படுகிறது.
இந்த மனிதர்களின்
டார்கெட் வெறியில்
மக்களையெல்லாம்
ஒரே குட்கா சுவைப்பின்
போதை வெளிச்சத்தில்
பார்க்க வைக்கிறது..
ஆம்
இப்போது
ஹிட்லர் அல்லது முசோலினி.
இவர்கள் காலடியில்
மற்றவர்களின் ஆசைகள் கனவுகள்
உடல்கள் உயிர்கள் எல்லாம்
பிணங்கள் பிணங்கள் தான்.
பொருள் முதல் வாதத்தின்
ரத்தக்களரிகளில் கூட
முண்டியெழுந்து
குடைக்காளான்கள்
தலை நீட்டுகின்றன.
செங்குடைக்காளான்கள்.
ரத்த துடிப்புகளில்
இந்த மனித சமுதாயம்
புரிந்து கொள்ளுகிறது
இந்த கட்டுக்கரன்சிகளும்
கட்டிடங்களும்
ஒரு பிரம்மாண்ட கல்லறையாய்
பயமுறுத்துகிறது என்று.
பிக் பேங்க் வெடித்து தான்
இந்த பிரபஞ்சம் இலை போட்டு
பந்தி விரித்தது என்றாலும்
அறிவு எனும் ஒரு
உட்கதிர் அந்த ஹிக்ஸ்போசானின்
பொருள் திணிவில்
கரு உயிர்த்து கதிர் விரிக்கிறது.
அறிவு சமுதாயத்தை
அன்புடன் தழுவிக்கொள்ளும்போது
துப்பாக்கிகள் கண்டுபிடித்து
மகிழும் மூலதனம்
அந்த பொன் குவியலை பாதுகாக்க
வெறி கொள்கிறது.
வெறி ஏதாவது ஒரு புள்ளியில்
தீர்ந்து போகும்.
மானிடம் இழையும் ஆற்றலே
எப்போதும்
ஒரு புதிய உதயமாய்
சுடர்ந்து நிற்கும்.
============================================
கருத்துகள் இல்லை:
கருத்துரையிடுக