2024
______________________________________
ருத்ரா
ஒவ்வொரு பெயர்களாய் சூட்டிக்கொண்டு
வருகின்ற புயல்களைப்போல்
நம்மையே விழுங்கிவிடுகின்ற
புயல் ஒன்று நம்மைப் பின் தொடர்கிறது.
அதன் பேர் "2024"
நாம் நம்மையே பார்த்துக்கொண்டு
பாடம் படிக்கிற தருணங்கள் இவை.
சுதந்திரம் வாங்கி
எழுபத்தைந்து ஆண்டுகள் ஆயின என்று
ஆடிப்பாடினோம்.
நீங்கள் எல்லாம் ஓட்டுப் போட்டுத்தான்
நாங்கள் இந்த
நாற்காலிகளை பிடித்துக்கொள்ள முடியும்
என்ற கதை மாறிப்போய்விட்டதே
அது தெரியுமா உங்களுக்கு?
பாருங்கள்.
இந்த சுதந்திரவிழா தோரணங்களில்
ஒளிந்திருக்கும்
அசுரக்குரல்கள் கேட்கின்றதா?
உங்களை உற்றுப்பார்த்து
சிந்தனை செய்ய வேண்டிய
ஒரு முட்டுச்சந்தில் நிற்கிறீர்கள்
என்பதை புரிந்துகொண்டீர்களா?
2024 உங்களை
பின்னாலிருந்து வந்து தாக்கும்
ஒரு மிருகம் என்பதை
உணருங்கள்.
நீங்கள் பிறக்கும்போதே
பழமையின் நாற்றத்தோடு தான்
கன்னிக்குடம் உடைத்து வந்திருக்கிறீர்கள்
என்று
இந்த மூட சம்பிரதாயங்களின்
பூதங்கள்
காத்திருக்கின்றன.
இத்தனை நூற்றாண்டுகளாய்
சாதி மதங்களின் அபினி சுற்றிய
புழுக்கூட்டு மண்டலங்களில் தான்
நெளிந்து கொண்டிருக்கிறீர்கள்
என்று தான்
இந்த அசுர நாக்குகள்
உங்களை
சுருட்டிக்கொள்ளக்காத்திருக்கின்றன.
2024 காலண்டர் கண் விழிக்கட்டும்
என்று நீங்கள்
காத்திருக்கத்தேவையில்லை.
அது உங்கள் மூக்குநுனியில்
இப்போதே வந்து
உட்கார்ந்து கொண்டு
சோதிடம் சொல்லுவதைக் கேட்டு
சோர்ந்து போய்விடாதீர்கள்.
தெளிச்சியுறுங்கள்.எழுச்சியுறுங்கள்!
__________________________________________________________
கருத்துகள் இல்லை:
கருத்துரையிடுக