அதன் அர்த்தம் என்ன?
______________________________________ருத்ரா
அதன் அர்த்தம் என்ன?
அந்த புன்முறுவலில்
நான் புதைந்து விட்டது
கொஞ்சம் கொஞ்சமாய் புரிகிறது.
என் கண்களின் விளிம்பில்
அந்த இருளும் ஒளியும்
ஒன்றுள் ஒன்று நுழைந்ததாய்
என்னை ஒரு
இன்பத்தின் சதுப்பு நிலக்காட்டில்
அமிழ்த்துகிறது.
அவள் சிரிப்பு என்ன சொல்லை
உள்ளே தைத்து வைத்திருக்கிறது?
தெரியவில்லை.
அதை தெரிந்து கொள்ளாமலேயே
இந்த அமுதக்கடலில்
ஆழ்ந்து கொண்டிருக்கிறேன்.
சிரிப்புக்கு அர்த்தமா?
சிரிப்பு சிரிப்பு மட்டும் தான்
என்று
இன்னொரு சிரிப்பில்
ஒன்றுமில்லை என்று
ஒரு சூன்யத்தில்
என்னை அமிழ்த்தி விட்டால்
என்ன செய்வது?
அந்த சிரிப்பின் அர்த்தம்
எனக்குள் மின்னல் பிழம்பின்
"களித்தொகை"யில்
ஒரு நங்கூரம் பாய்ச்சியிருக்கிறது.
அது அப்படியே இருக்கட்டும்.
அதைக் காதல் என்று
மொழிபெயர்க்க
என் இலக்கண இலக்கியம்
முதுகெலும்பு அற்று விழுந்து கிடக்கிறது.
உறுதியாய்
அவள் ஒரு சொல் உதிர்ப்பாள்
அதில் என் பூமி
விதைத்துக்கொள்ளும்
எல்லாவற்றையும்.
அறுவடையாய் அவள் இதயத்தை
அள்ளிக்கொள்ளும் வரை
அவள் சிரிப்பு போதும்.
அந்த அமுதத்தடம் மட்டுமே
போதும்.
_______________________________________________
கருத்துகள் இல்லை:
கருத்துரையிடுக