என்ஜிகே

என்ஜிகே
==============================================ருத்ரா


உண்மையில் இதற்கு
நகோகு என்று தானே
வைத்திருக்கவேண்டும்.
தமிழையெல்லாம்
நாம் ஆங்கிலத்தில் தான்
ஒலித்துக்கொண்டிருக்கிறோம்.
போகட்டும்


செல்வராகவன் இயக்கம்.
திறன் மிக்க சூர்யாவின் நடிப்பு.
இதற்குள்
அடைபடும் கதையோ
சல்லடையில் ஊற்றிய தண்ணீராய்
நழுவிவிடுகிறது.
ஒரு சினிமாவின்
உண்மையான நடிகன்
யார் என்றால்
கதை...கதை.. மட்டுமே.
இது மாதிரி கரைவேட்டி அரசியல்..
அதற்குள்ளிருந்து
சத்யராஜ் மாதிரி ஒரு நாகராஜ சோழன்
அவதாரம் செய்வது
அப்புறம்
ஏதாவது ஒரு சண்டைக்காட்சி.
இதற்கு இடையில்
குத்தாட்டப்பாடல்களுடன்
காதலை கொச்சைப்படுத்துவதையும்
இது தான் ட்ரெண்டி என்பது போல்
சாதிப்பது...
இந்த "அரச்ச மாவு"அரைக்கும் உத்திகளை
வைத்துக்கொண்டு
திரைப்படங்களில்
இலக்கியத்தனமாக விருது பெறும்
எச்சில் ஊறல்களையும்
வைத்துக்கொண்டு என்ன செய்வது?
கார்ப்பரேட் என்றால் ஏதோ
ஏலியன் என்று
அதன் சுரண்டல் மிக்க உள்ளடக்கத்தை
நீர்த்துப்போக வைத்து விட்டு
சினிமாத்தனமான வில்லன்
ஒருவனை விஸ்வரூபம் செய்து
பிலிம்குள்ளேயே ஒரு பிலிம் காட்டும்
வித்தையைத்தான் இயக்குனர்
திறம்பட செய்கிறார்.
என்ஜிகே என்றால்
ஏதோ அதிவேக ரயில் எஞ்ஜினை
எதிர்பார்க்கவைத்துவிட்டு
வெறும் "ரேக்ளா ரேஸ்" விடுவது போல்
ஒரு ஏமாற்றத்தை தான்
இப்படம் தந்திருகிறது.
இருப்பினும்
நீயா? நானா? என்பது போல்
சூர்யாவோடு
ரகுல் ப்ரீத் சிங்கை
உரச விட்டிருப்பது போன்ற‌
விறு விறு காட்சிகள்
செல்வராகவனின் முத்திரைகள் தான்.
சூர்யாவின் மாமூலான மசாலா நடிப்பை மீறி
அரசியல் அக்கினியின் கொழுந்துகள்
அவருக்குள் ஒரு
வெப்பத்தை கர்ப்பமாக்கியிருக்கிறது
இப்படம்.
இருப்பினும் வெறும் "லாம்" தான்.
அதாவது
படத்தை பார்க்க"லாம்".
அவ்வளவு தான்.

============================================================