அன்பான ரஜினி அவர்களே!
____________________________________ருத்ரா
வாழ்த்துக்கள்.
கடைசியாக உங்கள் பையிலிருந்து
பூனைக்குட்டியை எடுத்து
வெளியே விடும்
"மாதத்தை"குறித்து விட்டீர்கள்.
அந்த "மியாவ் மியாவ்" குரலை
இந்த மாதக்கடைசியில்
எழுப்புவதாக வேறு
பிரகடனம் செய்து விட்டீர்கள்.
இந்த தமிழர்கள்
உங்கள் உயிரை கேட்கவில்லை.
இவர்களின் உயிரினும் மேலான
இவர்கள் உரிமைகளை
பலியாக கேட்காதீர்கள்.
திராவிடம் வேறு தமிழ் வேறு இல்லை.
கடல் கடந்து புகழ் பரப்பிய
பண்டைத்தமிழன்.....
திரைமீள்வோன் எனும்
அந்த தமிழ் மறவன்.....
அவர்கள் ஒலிப்பில்
த்ரமீளன் ஆகி
த்ராவிடன் ஆகி தமிழனும் ஆகினான்.
அப்படியிருக்க
"திராவிடன்" என்றாலே
திராவகமாய்
நீங்கள் எரிச்சல் அடைவதன்
மர்மம் என்ன? மாயம் என்ன?
ஆத்மீகம் எனும் சாந்து பூசி
தமிழ் விடுதலை உணர்வுக்கு
சவ அடக்கம் செய்யவா
எல்லாவற்றையும் மாற்றுவோம் என்று
கிளம்பியிருக்கிறீர்கள்?
திராவிடம் என்றால் தமிழ்.
தமிழ் என்றால்
மானிட இயலின்
மாண்பு என்று பொருள்.
அந்த மாண்புக்குள் அது
சாதிகள் அற்ற சம நீதியின்
சமுதாய அறம் என்று பொருள்.
அந்த அறத்தொடு நிற்றல் என்றால்
மனிதனை
மனிதனே பலி கேட்கும்
மனு நீதிக்கு சாவு மணி அடிப்பதே
என்று பொருள்.
உங்கள் ஆத்மீகம்
நான்கு வர்ணமெட்டில்
அந்த ஆதிக்கக்கோட்டையின்
ஆலய மணியாக
எதிரொலிப்பது எங்களுக்கு
இப்போதே கேட்கிறது.
தங்கள் தோள்களில் மூட்டை மூட்டையாக
ஊழலை வைத்துக்கொண்டு
ஒரு ஊழல் எதிர்ப்பு ஆயுதம் கொடுத்து
உங்களை இவர்கள்
களம் இறக்கலாம்.
ரகசியமாய் உங்கள் முதுகில்
ஒரு கத்தியின் முனை ஒன்று
உரசிக்கொண்டிருக்க
இந்த திராவிடத்தை வேரறுக்க என்று
இவர்கள் உங்களுக்கு
ஒரு அட்டைக்கத்தி தரலாம்.
கத்தி தான் அட்டையே தவிர
அதில் சொட்டும் சூழ்ச்சியின் ரத்தம்
நிஜமே! நிஜமே தான்!!
தளபதியாய் நடித்த உங்களுக்கு
இரு தளபதிகளாய்
அருகருகே நிற்பதே
எங்கள் உரிமைக்குரலை நசுக்கப்போகும்
ஒரு இயக்கத்தை
கட்டியம் கூறிக்கொண்டிருக்கிறது.
தமிழும் தமிழகமும்
ஆரியத்தால் வீழ்ந்துபோகும்
காட்சிகளுக்கு
ஒத்திகை பார்த்து
ஒத்தடம் கொடுத்து
ஏமாற்றப்போகும்
ஒரு தந்திரகட்சியாக
உங்கள் கட்சி ஆகி விடக்கூடாது
என்பதே எங்கள்
விருப்பமும் வேண்டுகோளும்.
வாருங்கள் !
எங்களோடு நின்று
இந்த தமிழையும் தமிழகத்தையும்
மதம் எனும் தீ வெறி ஏற்றி
அழித்திட நினைக்கும் சக்திகளிலிருந்து
காப்பாற்ற கை கோர்த்து வாருங்கள்.
வருக! வருக!!
ரஜினி அவர்களே
வருக! வருக!!
_____________________________________________
கருத்துகள் இல்லை:
கருத்துரையிடுக