கனவு என்பது.....

கனவு என்பது....

_______________________________

கனவு கண்டு கொண்டிரு.

தூக்கத்தில் 

சவம் போல் ஆன பின்

மொய்க்கும் 

மனபிம்பங்களின்

ஈக்கள் மொய்த்தலை

கனவு என்று சொல்வதா?

விழித்திருக்கும் போது

இமையோர சாலைகளில்

நினைவுகளைக்கொண்டு

நடைபோடுவதே

இங்கு கனவு ஆகும்.

மனிதனில் முதலில்

மனிதனை தேடு.

சமுதாய ஓர்மை கொண்ட‌

ஒவ்வொரு மனிதனின்

மனத்து வரைபடம்

புகுந்து செல்.

வரலாற்றுச்சுவடுகளில்

காயம்பட்ட 

மனிதம் 

புண்களை ஏந்தி ரத்தம் கசிய கசிய‌

நிகழ்வுகளின் உயிரற்ற 

சடலங்கள் கால் இடற‌

தடுமாறிய கால கட்டங்கள்

எத்தனை?எத்தனை?

வானத்திலிருந்து கடவுள்கள் 

கூவியதாய்

இவர்கள் குவித்த கூளங்கள் எல்லாம்

வாளும் ஈட்டியும்

அல்லது 

பீரங்கிகளின்

மரண உமிழ்வுகளும் தானே.

சர்வ அதிகாரம்

இறைவன்

எனக்கு கொடுத்துவிட்டான்

என்று

இவர்கள்

மக்களுக்கு அளித்தது எல்லாம்

அவலங்களின் ஓலங்கள் தானே.

ஒரு ரொட்டித்துண்டு

அல்லது

ஒரு கவளச்சோறு

கிடைக்குமா என்று

ஏங்கும் மனிதர்கள்

பார்க்க பார்க்க‌

அவர்களின்  நாய்களுக்கு

வயிறு புடைக்க தரும்

கறி விருந்து என்பதில்

என்ன நியாயம் இருக்க முடியும்?

ஆதிக்கவெறியின்

ரத்தச்சுவடுகளைக்கொண்டு

எழுதப்பட்டவற்றையா

நாம் வரலாறு அல்லது 

புராணம் என்று

காலில் விழுந்து

கும்பிட்டுக்கொண்டிருக்க‌

வேண்டும்?

இதையெல்லாம் மாற்றி 

மனிதநேயம் மட்டுமே

எங்கும் ஆளவேண்டும்

என்பதை 

எந்த சாத்திரங்கள்

கொடியேற்றி 

கோலோச்சியிருக்கின்றன‌?

ஆனாலும்

இங்கே

பசித்து எரியும் வயிறுகளின்

கேள்விகளே ஒலிக்கக்கூடாது.

மீறி ஒலித்தால்

மக்களின் 

எலும்புகளும் கபாலங்களுமே

இங்கு மிஞ்சும்.

இது எல்லாம் மாறி

மனிதம் என்பதே ம்கிழ்ச்சி தான்

என்றும்

சமநீதியின்

படிக்கட்டுகளில் தான்

சமுதாயம் பயணப்படும்

என்றும் 

எப்போது மாறும்?

துருப்பிடித்த சமதாயத்து

சாதி மதங்கள் புரையோடி

சீழ் பிடித்து தேங்கிக்கிடக்கிறது.

இது என்று மாறும்

அல்லது

மாற்றப்படும் ?

என்ற மனவெளிப்பாடுகளே

அதன் இயக்கப்பாடுகளே தான்

கனவு என்று

இங்கே அக்கினித்திரையில்

சலனங்களை

நர்த்தனம் புரிய வைக்கும்.

இதை 

சும்மா நோகாமல்

ஸ்வப்னம்

என்று நா வருடி வருடி

இலக்கியம் செய்வதே

மனிதனின் அயோக்கியத்தனம்

அரங்கேறும் தருணங்கள்..

கனவு என்பது காண்பது அல்ல.

நமக்கான‌

யுகத்தின் இமையை 

உரித்து

உறுத்துப்பார்த்து

வீறு கொள்வதே கனவு ஆகும்.

____________________________________________

சொற்கீரன்.

தமிழ் வெல்லட்டும்.

தமிழ் வெல்லட்டும்.

___________________________________________________

கடவுள் இல்லை என்றால்

நாம் இல்லை

என்று ஆயிரம் ஆண்டுகளாக‌

நம் மூளையை வழித்து விட்டவர்கள்

கடவுள் அருகே நீ இருக்க‌

சமஸ்கிருத மந்திரங்கள் தான் துணை

என்று

நம் மூளைக்கபாலத்தை முழுவதும்

சுரண்டி

அந்த சமஸ்கிருதக்கூளத்தை

அடைத்து விட்டார்கள்.

வெள்ளைக்காரன் வந்து

அவனுக்காகவும் நமக்காகவும் 

அறிவுச்சன்னலை திறந்து விட்டான்.

அந்த மதவாத தந்திர நரிகள்

அந்த சன்னலையும் அவர்களே

குத்தகைக்கு எடுத்துக்கொண்ட பின்

நம்மிடமே

ஆங்கிலம் மிலேச்சம் 

தமிழ் அதைவிட மோசமான மிலேச்சம்

என்று 

மீண்டும் மீண்டும்

நமக்கு மூளைச்சலவை செய்தார்கள்.

அதற்கு பக்க பலமாக 

இருந்தவர்களே

இருப்பவர்களே

நம் மன்னாதி மன்னர்கள்.

இந்த அடிமைத்தோலை

எப்படி நம்மிடமிருந்து

உரித்துக்கொள்ளப்போகிறீர்கள்.

கடவுள் பக்தி எனும்

நாசகார கவசம் நம்மை விட்டு

தகர்த்தெறியப்பட வேண்டும்.

அப்போது தான் நச்சுத்தனமான‌

சாதி வெறியின்

நான்கு வர்ண முலாம் பூச்சை

துடைத்து எறிய முடியும்.

இதற்கு

உங்கள் அறிவுக்கண்கள் 

திறந்தே ஆகவேண்டும்.

அதெல்லாம் முடியாது.

கும்பாபிஷேகம் போவேன்

அர்ச்சனைத்தட்டுகள் ஏந்துவேன்

என்றால்

உங்கள் கல்லறைளை

உங்கள் முதுகில் வைத்துத்

நீங்களே தைத்து வைத்துக்கொண்டு

திரிகிறீர்கள் என்று பொருள்.

தமிழ் வெல்லட்டும்.

தமிழன் விழிக்கட்டும்.

______________________________________________

சொற்கீரன்

 

"திரைவியம்"

 

தமிழ் பல் ஆயிரம் ஆண்டுகளுக்கு முன் எல்லா மொழியாகவும் இருந்திருக்கிற‌து.திரை என்னும் கடல் அலைகளைகடந்து பல மக்களின் இனக்குழுக்களோடு உறவாடி இந்த தமிழ் மொழியில் பல ஒலிவடிவங்களை உருவாக்கி இருக்கலாம்.அப்படி ஏற்பட்ட மொழிவடிங்களில் பாலியும் ஒன்று என நாம் ஏன் எடுத்துக்கொள்ளக் கூடாது? திரை கடலோடி "திரைவியம்" தேடு என்பது வெறும் பொருள் வணிகம் மட்டும் அல்ல.மொழி வடிவங்களும் தான். இன்னும் சொல்லப்போனால் தமிழில் பல் வடிவங்களில் வழங்கும் சொல் அல்லது அசைச்சொல் "ஆர்" என்பதாகும்.இதற்கு அழகு சிறப்பு ஆற்றல் அறிவு ஆரவாரம் இன்னும் பலப்பல உணர்வுகளில் பொருள் கொள்ளப்படுகிறது.சிறப்பு எனும் பொருளில் தமிழ் ஆர் வழங்கப்பட்டிருக்கிறது என்பதை நாம் அறிவோம்.எனவே தமிழிலிருந்து தான் "ஆரிய" தமிழ் கிளைத்திருக்கவேண்டும்.புத்த சமணர்கள் தமிழ் ஆரியர்களே.அப்படி ஒரு பாலித்தமிழர் இந்த பாடலைப்பாடியிருக்கலாம்.அந்த மூலத்தமிழ்ப்பாடலே பாலியிலும் பாடப்பட்டிருக்கல்லம்.இது எனது ஒரு சிந்தனை தான்.இது ஆராய்ச்சிக்கு உட்படுத்தப்படவேண்டும். இந்த பாலித்தமிழர்கள் புத்த சமண மரபுப்படி "சங்கம்" என்று தமிழ்ச்செயுட்களை தொகுத்திருக்கலாம்.நீங்கள்

யாதும் ஊரே யாவரும் கேளிர் என்ற பாடலில் வரும் இயற்கையான தமிழின் "ஆறு" போன்ற நடையை

உற்று நோக்கினால் தெரியும் அது தமிழ்ச்செய்யுள் என்று.இங்கிருந்து அங்கு போய் அங்கிருந்து கூட‌

இங்கும் வந்திருக்கலாம்.ஆனால் அது மொழிபெயர்ப்பு பாடல் இல்லை என்பது அந்த தமிழ்ச்சொல் யாப்பிலிருந்து தெரிகிறது.இருப்பினும் இது மேலும் ஆய்வுக்கு உட்படுத்தப்பட்டால் ஆரியம் என்னும் வேரே

தமிழ்ப்பால் பட்டது தான் என்ற முடிவுக்கும் கூட நாம் வரலாம்.ஏற்கனவே திரு.நாகசாமி போன்று பெரியவர்கள் என்று முத்திரை குத்திக்கொண்டவர்கள் திருவள்ளுவர் திருக்குறளைக்கூட சமஸ்கிருத சாஸ்திரங்களிலிருந்து தமிழில் எழுதியிருக்கலாம் என்ற பொய்மைகளை தூவ விட்டிருக்கிறார்கள்.அது போல் தான் சமஸ்கிருத பிராகிருத பாலி போன்றவற்றில் தர்மசாஸ்திரங்களை இப்படி மொழி பெயர்த்து எழுதியிருக்கலாம் என்று

குழப்படி செய்யும் பொய்மைகளை பரப்பும் செயலாகவே இது இருக்கலாம்.இவர்கள் இப்படி சொல்வதற்கு அசோகர் காலத்து பிரம்மி எழுத்துக்களையும் கூட சாட்சிக்கு இழுத்திருக்கலாம்.ஆனால் அசோகர் காலத்துக்குமுற்பட்ட தமிழி கல்வெட்டுகள் கண்டுபிடிக்கப்பட்ட பிறகு புத்த சமண சான்றோர்களுக்கு முற்பட்ட தமிழ் சான்றோர்கள் செய்யுட்களே அவர்களுக்கும் முற்பட்ட இலக்கியங்களை தந்திருக்கலாம்.கி.மு 3000 ஆண்டுகளுக்கு முற்பட்ட சிந்து வெளி முத்திரைகளில் "நல்நன்" என்னும் நன்னன்"பெயர் குறிப்பிடப்பட்டிருக்கிறது.ஏன் இப்படிச்சொல்லுங்களேன்.மரவ(மரா) மரமும் குரவ(குரா) மரமும் (இவை சங்கத்தமிழ்ச் சொற்கள்} நிறைந்த தமிழ் நிலக்காட்டின் வேடன் (வால்மீகி என்று இவர்கள் இந்த கரையான் புற்றை ச‌மஸ்கிருதத்தில் சொல்லிக்கொண்டார்கள்).அவன் எழுதிய ஏதோ அந்த குறிஞ்சித்திணக்கதையை மரன் எனும் ரமன் அல்லது ராமன் கதையாக எடுத்துக்கொள்ளக்கூடாது.ஏனெனில் ஆரியத்தமிழன் ஆன பிறகு மற்ற‌

தமிழ் இனக்குழுக்குள் எதிரிகள் ஆகியிருக்கலாம்.அதை நான்கு வர்ண பிரிவுக்குள் வைத்துக்கொண்டுஇப்படி எல்லா திரிபுகளையும் செய்து கொண்டிருக்கலாம்.கொஞ்சம் விட்டால் தமிழ் இலக்கியங்கள் அத்தனையும் திரிக்கப்பட்ட ஆரியத்தமிழ் என்றும் கூட இவர்கள் அடம்பிடிக்கலாம்.போகட்டும்.தமிழ் மொழி

உலக இனக்குழுக்களுக்கு முன் ஒலிப்பு (பயோனீயரிங்) மொழியாக இருந்திருக்கும் என்பதில் உண்மை இருக்கிறது.

__________________________________________________________________சொற்கீரன்

அன்பு மகளே!

 

மகளுக்கு ஓர் உலக தினம்

_________________________________________

அன்பு மகளே!

உனக்கு இன்று ஓர் உலக தினம்.

பூவுக்கு  போய்

பூப்போல் சிரி..பூப்போலபேசு

என்று 

சொல்வது  அதிகபிரசங்கித்தனம்.

உன்னைப்பார்த்து தான்

பூமியிலேயே

பூக்கள்

முகம் காட்ட வந்திருக்கின்றன.

முறுவலுடன்

உன் முகம் பார்த்தபோது

எல்லா இளஞ்சூரியன்களும்

நெருப்பைக்கழற்றி வெளியில் வைத்துவிட்டு

உன்னோடு

தண்ணிய பார்வையை

பகிர்ந்து கொள்கின்றன.

அப்பாவுக்கு பெண்பால் 

அம்மா.

அது போல் 

மகனுக்கு பெண்பால் 

மகள் 

என்று மடத்தனமான‌

இலக்கணக்குறிப்பா?

மகன் மகனாக மட்டும் தான்

இருக்கிறான்.

மகள் மட்டுமே

மகளாக மட்டும் இல்லாமல்

மகனாகவும் இன்னும்

அம்மா அப்பா என்று

மொத்த அன்பின் பிம்பமாக‌

பிரதிபலிக்கின்றாள்.

மகளே

நீ பிறக்கிறாய்.

நீ பிறப்பிக்கவும் செய்கிறாய்.

உலகில் 

மற்றவை எல்லாம் 

ஒளியை மறித்துக்கொண்டு

நிழல் ஏற்படுத்தும்.

மகளே!

அது எப்படி

நீ மட்டும் 

நிஜமாகவும் நிழலாகவும் 

இருக்கிறாய்.

ஆம் தாயே.

உன் இதயம் மட்டுமே

எங்களுக்கு அன்பை உயிர்க்கும்

கருப்பையாக‌

இருக்கிறது.

_____________________________________________

சொற்கீரன்.

எத்தனைக்காலம் தான்...?

எத்தனைக்காலம் தான் ஏமாற்றுவார் 

என்று

குதிரையில் கதாநாயகியை 

உட்காரவைத்துக்கொண்டு

கேட்டவரின் கேள்வி

இன்னும் அந்த கோடம்பாக்கத்து

ஜிகினாத்தோட்டத்தில்

மின்னட்டம்பூச்சிகளைத்

தூவிக்கொண்டிருக்கிறது.

சித்தாந்தங்கள் பாஷ்யங்கள்

ஸ்லோகங்கள் தேவ வசனங்கள்

புறாக் கூடுகளிலிருந்து

பக்கூம் பக்கூம் என்று வரும்

இறைவர்களின் மொழிபெயர்ப்புகள்

எதுவும்

எந்த சின்னத்துரும்பைக்கூட 

கிள்ளிப்போடவில்லை.

இருப்பினும் 

கையகல நாடுகளுக்கு

கொடியேற்றி

ஏவுகணைகள் மூலம்

மரண மழை தூவி

மனிதம் எனும்

ஒளிச்சுடரையே கசாப்பு செய்து

விளையாடும்

போட்டிப்பொருளாதாரத்தை 

வைத்துக்கொண்டு

என்ன செய்யப்போகிறோம்?

மனிதக்கருவையும் 

ஏ ஐ களின் க்ருப்பையில்

அடைகாத்து

செய்யும் சிலிகான் கூடுகளில்

மடங்கிப்போகவா

மனிதன் இங்கே வந்தான்?

இது கேள்வியல்ல.

எரிமலைகளின் 

அக்கினிக்குழம்பில் 

எழுதப்பட்டுக்கொண்டிருக்கும்

புது யுகத்தின்

மனித சிந்தனைப்படிமங்கள்.

சிந்தனை என்பது

ரத்த சதையல்ல‌

தின்று வயிறு புடைத்துக்கொள்வதற்கு.

ஒரு உந்து விசை.

பேரண்டமே சிறகு விரிக்கும்

அறிவின்

பெரும்பறவை.

பற..பற மனிதனே!

பிற..பிற மனிதனாகவே..பிற!

கடவுள்கள் நம்மிடம் கற்பதற்கு

காத்திருக்கட்டும்!

_____________________________

சொற்கீரன்

"காணி நிலம் வேண்டும்!"

 

"காணி நிலம் வேண்டும்!"

____________________________________

பாரதி

அது கேட்டான் இது கேட்டான் என்று

நானும் தான் கேட்டேன்

ஒரு கவிதை எழுதவேண்டும்

என்று.

போதும் போதும்

என்று

அதுவும் என்னிடம் கேட்டது

ஒரு காகிதமும் பேனாவும்

கவிதை எழுத வேண்டும் என்று.

என்ன உனக்கா வேண்டும்.

கவிதையே கவிதை எழுதுமா?

அது கவிதை எழுதி

சரக்கென்று நீட்டியது.

உலகத்திலேயே மதிப்பு வாய்ந்தது

பேனாவும் காகிதமும்

நீ கவிதை எழுதி

அதை சவம் ஆக்கிவிடாதே.

________________________________________________

பூச்சிக்கவிஞன்.

மொழி பெயர்ப்பு

 

மொழி பெயர்ப்பு

___________________________________

வேறு என்ன என்று

இதை மொழிபெயர்ப்பது?

காற்றில் இலைகள் உரசினாலும்

காதல்.

காக்கைகள் மூக்கோடு மூக்கு

கீறிக்கொண்டாலும்

காதல்.

பட்டாம்பூச்சி சேமேன்னு

பறந்த கொண்டிருந்தாலும்

அதன் இறகுகள்

செவிட்டில் அறைவது போல்

வண்ணங்களை

நம் மீது கொப்புளித்தாலும்

காதல்.

ஏன்

எதனுடைய நிழல்கள் இவை என்று

தெரியாத 

இரு நிழல்கள்

இரண்டும் அசைவில்

சேர்ந்து சேர்ந்து விலகுவது போல்

தெரிந்தாலும்

அது முத்தம் கொடுத்துக்கொள்ளும் 

காதல்

ஜேம்ஸ்வெப் சொல்கிறது

இரு காலக்சிகள்

முட்டி மோதிக்கொன்டிருக்கின்றன‌

என்று.

நம்மாளு சொல்வது.

அது வெறும் ஊடல் தான்.

அதற்குள்

வெப்பமும் ஒளியும் 

செய்யும் 

"சும்மா அதிருதுல்ல..."எனக்காட்டுவதும்

காதல்.

பெருவெடிப்பு என்பதே

காதல் ஏக்கப்பெருமூச்சின்

பிரம்மாண்டவெடிப்பு...

காதல் ஒரு

கிசு கிசுப்பு போல்

கடவுளும் சைத்தானும்

பரிமாறிக்கொண்டதும்

காதலே.

ஈடன் தோட்டத்து நெருக்கடி

இன்னும் அவிழ்க்கப்படவில்லையே.

அவிழ்க்கப்படாத 

ஆசை நெருப்புகளின்

மத்தாப்புக்காடுகளே

காதல்.

என்ன செய்வது?

ஆற்றோர‌

நாணல் கீற்றுச்

சன்னல் கம்பிகளின்

இடையே

இந்த பக்கமும் 

அந்த பக்கமும்

வறக் வறக் என்று...

இரண்டு தவளைகள் 

பரிமாறிக்கொள்வதும்

நிச்சயம் காதல்  தான்.

காதல் தவிர வேறில்லை.

_____________________________________

சொற்கீரன்