உங்கள் வழியே உங்கள் விழி!
_______________________________________________
ருத்ரா
கனவு சாம்ராஜ்யத்தைக் கட்டுவதில்
இந்த காக்காய் இறக்கைகளையும்
முள்ளுக் குச்சிகளையும் கொண்டு
கூடவே
ஆசைகளையும் ஏக்கங்களையும்
அடைகாத்துக்கொண்டிருக்கும்
அன்பான இளைஞர்களே!
உங்கள் மூச்சுக்காற்றில்
ஒரு செம்புயலின் சிறகுகளையும்
செருகிக்கொள்ளுங்கள்.
நூற்றாண்டுகள் உங்கள் கண்ணெதிரே
வரலாற்றின் பின்னல்களை
சிலந்திகளாய் பின்னிக்கொண்டிருக்கின்றன.
சுதந்திரம் எனும் நெருப்பு கனல்வதை
உங்கள் வாழ்க்கை அவலங்கள்
"கலைடோஸ் கோப்" காட்டுவதையும்
உற்று நோக்குங்கள்.
எதிலிருந்து எதற்கு சுதந்திரம்?
எப்படி அது
இமைச்சிறகு உரிக்கும்?
அறிவின் இந்த சாவிக்கொத்துகள்
உங்கள் விரல் இடுக்கில்
சுழன்று கொண்டே இருக்கவேண்டும்.
புரியாத சத்தங்களின்
விளங்காத நுரைக்கோட்டைகளின்
அலம்பல்களின்
குத்தாட்டங்களில்
குலைந்து போய் விடாதீர்கள்.
சமுதாய எழுச்சியும் மலர்ச்சியுமே
உங்கள் இலக்குகள்.
அதனை சீர்குலைக்கும்
போதைகளின் "லேசர்" வெளிச்சக்காடுகளில்
தொலைந்து போய் விடாதீர்கள்.
உங்கள் வழியே
உங்கள் விழி!
உங்கள் மைல்கற்களில்
உங்களை சோர்ந்து போகச்செய்யும்
இந்த சிதறல் மேகக்கூட்டங்களை
இந்த சில்லறைச்சத்தங்களை
சின்னா பின்னமாய்
சிதறடியுங்கள்.
_________________________________________________
கருத்துகள் இல்லை:
கருத்துரையிடுக