பேஎய் செஞ்சிவப்பின் நீள் வரி போர்த்து.
_______________________________________கல்லிடைக்கீரன்
(ஓலைத்துடிப்புகள் 110)
காழ்த்த நெடுங்கால் தண்பறைக் குருகின்
களிதுள் கயல்ஆரும் நளிகடல் சேர்ப்ப!
எக்கர் ஞாழல பாசிலை அடைகரை
வதிநிழல் ஓமை பொருந்தாக் காணிய
நெய்தலங் கானல் கண்டிசின் பெரும.
மாழை வரிவிழி நுதல் அளை நோக்கில்
ஆகம் அணியிழை சேக்கும் காதலின்
கறை உழற்றன்ன கொடு எழில் பூப்ப
புன்கு அவிழ் பொரிப்பூ படர்ந்த நகையில்
அவள் ஆங்கு சுழித்த நாணில் வீழ்தரு நின்
நாணில் நீர்மை கண்டுநனி நெடுவான்
வெட்கும் ஒட்கும் எல் களைந்து எல்லின்
பேஎய் செஞ்சிவப்பின் நீள் வரி போர்த்து.
_________________________________________
காதல் செழித்த தலைவியையும் மறந்து
பரத்தமையின் பால் காமுறும் தலைவனுக்கு
தோழி அறிவுறுத்தியதே இப்பாடல்.புன்கை மரம்
பூத்துச்சொரிந்தது "பொரி" படர்ந்தாற்போல்
இருக்கும் அந்த பரத்தையின் நாணமற்ற
சிரிப்பில் தலைவன் விழ்ந்தது அதை விட ஒரு
நாணமற்ற செயல் என தோழி இடித்துக்காட்டுகிறாள்.
அதையே இங்கு என் சங்கநடைச்செய்யுள் கவிதையாக்கி
இங்கு எழுதியிருக்கிறேன்.
______________________________கல்லிடைக்கீரன்
கருத்துகள் இல்லை:
கருத்துரையிடுக