தேசத்தந்தையே !
====================================ருத்ரா
தேசத்தந்தையே!
எந்த ஆண்டும் இல்லாமல்
இந்த ஆண்டுதான்
உன் வெறுமையை
அதில் தகிக்கும் அக்கினிக்குழம்பை
தாங்கவொண்ணாமல்
நாங்கள் தவிக்கிறோம்.
"ஹே ராம் என்று
கூப்பிட்டாயே
அந்த ராமனிடம் கேள்
ஓ ராமா !
உன் ராஜ்யத்தில்
செங்கோல் என்றால்
கடப்பாரையா
என்று கேள்.
ஈஸ்வர அல்லா தேரே நாம்
என்றேனே
உனக்கு இந்தி தெரியாதா ?
என்று கேள்.
உன் தராசு தட்டுகளில்
ராமரும் பாபரும்
ஒன்றாய்த்தானே இருந்தார்கள்.
இவர்கள் தராசுகள்
தடம் புரண்டது
ஏன் என்று கேள்?
"டுமீல் டுமீல்"
அந்த துப்பாக்கியில் இன்னும்
குண்டுகள்
பாக்கியிருந்தது போலும் !
"உன்னை எத்தனை தடவைகள்
சுட்டாலும் நீ
சாக மாட்டாய் போலிருக்கிறது!"
அந்த ராம்
இன்னும் உறுமிக்கொண்டிருக்கிறான்.
அட!
தேசத்தந்தை தேசத்தந்தை
என்று இவர்கள்
மலர் தூவிக்கொண்டிருப்பது
இந்த "ராம்"க்கு த் தானா?
"ஹே ராம்!"
நம் தேசத்தந்தை
மீண்டும் மண்ணில் வீழ்ந்தார்!
========================================
கருத்துகள் இல்லை:
கருத்துரையிடுக